VSA. – Tyler Robinson (22), die verdagte in die moord op Charlie Kirk, is deur sy pa en ‘n jeugpastoor oortuig om hom aan die polisie oor te gee nadat hy by sy pa oor die moord gebieg het.
Lees ook: Kirk-moordverdagte in hegtenis
Ondersoekers het gesê Robinson het aan sy pa gebieg dat hy die moordenaar is en het gesê hy sal eerder selfdood pleeg as om homself aan die polisie oor te gee. Die pa het ‘n jeugpastoor geskakel, wat ‘n familievriend is, en hulle het Robinson kalmeer en oortuig om homself aan die polisie te oorhandig. Die jeugpastoor het die owerhede geskakel wat Robinson in hegtenis geneem het.
Utah se goewerneur, Spencer Cox, het gesê CCTV-beeldmateriaal wys dat Robinson vier uur voor die skietery by die Utah Valley-universiteitskampus aangekom het. Volgens Cox het ‘n kamermaat van Robinson op boodskappe gewys op Discord, ‘n kommunikasie-app, van ‘n “Tyler” wat praat van ‘n vuurwapen wat in ‘n bos, in ‘n handdoek toegedraai, gelos moet word.
Die wapen is deur die FBI in ‘n beboste gebied in ‘n handdoek toegedraai naby die kampus gevind. Cox het gesê patrone met ingegraveerde “boodskappe” is saam met die vuurwapen gevind. Hey Facist! Catch! en O Bella ciao, Bella ciao is van die inskrywings wat op die patrone gevind is.
Cox het gesê hy is nie bewus van nog moontlike inhegtenisnemings in die saak nie. Robinson, ‘n Mormoon, sal Dinsdag aangekla word. Sy ma is ‘n maatskaplike werker en sy pa besit ‘n besigheid wat kaste inbou.
Donald Trump het Robinson se familie geprys vir hulle rol in die saak en het gesê hy “hoop die moordenaar kry die doodstraf”.
Bronne: BBC, ABC News, The Economic Times
Lees ook: Kirk-moordverdagte in hegtenis
