GAUTENG. – Lt.kol. Sikhetho Mawila (63), verbonde aan die kantoor van die Valke se direktoraat vir prioriteitsmisdaadondersoeke in Durban, is Maandag dood in ‘n oop veld in Tsakane gevind.
Kol. Philani Nkwalase sê lt.genl. Godfrey Lebeya, nasionale hoof van die Valke, het die brutale moord sterk veroordeel.
Mawila was deel van die Valke se waarheids- en versoeningskommissie.
Na bewering het Mawila Saterdag omstreeks 14:00 sy huis in Tsakane in sy blou Kia verlaat. Hy was glo vir werk onderweg na Durban en sou volgens familielede by ‘n vulstasie op Heidelberg brandstof ingooi. Nadat daar na ‘n uur niks van hom gehoor is nie en hulle hom nie op sy privaat of amptelike selfone in die hande kon kry nie, het hulle bekommerd geraak. Hy is as vermis aangemeld.
Maandag is ‘n liggaam wat deur ‘n verbyganger in ‘n oop veld in Tsakane-uitbreiding 19 opgemerk is aan die polisie gerapporteer.
Die oorledene, wat positief deur sy familelede as Mawila uitgeken is, is op die toneel met kopbeserings aangetref. Hy het twee skietwonde en drie steekwonde gehad.
Nkwalase sê sake van moord, ontvoering en kaping word ondersoek.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel
