LIMPOPO. – ‘n Konstabel (44) verbonde aan die Silverton-speurtak in Pretoria, is Woensdagmiddag in Limpopo op aanklagte van dwelmhandel en die besit van ‘n vermoedelik gesteelde voertuig in hegtenis geneem.
Brig. Hlulani Mashaba sê die konstabel is tydens ‘n intelligensiegedrewe operasie met ‘n Nissan NP200 op die N1-hoofweg suid, buite Polokwane, naby die Shell Ultra City, onderskep. Die provinsiale teen-smokkeleenheid en Tshimollo-veiligheidsmaatskappy was deel van die operasie. Altesaam 2 095 pakkies nyaope, met ‘n geskatte waarde van R85 000, is glo in die konstabel se besit in die vermoedelik gesteelde bakkie met Gauteng-registrasieplate, wat deur hom bestuur is, gekry.
Tydens die arrestasie is daar op die konstabel se dienspistool beslag gelê. Hy word by Westernburg-polisiestasie aangehou en sal vandag (Donderdag) op aanklagte van dwelmhandel en die besit van ‘n vermoedelik gesteelde motorvoertuig in die Polokwane-landdroshof voorkom.
