GAUTENG. – Konst. Lionel Macoba (25), sers. Vincent Messiah Ndhlovu (44) en sers. Peaceful Evgenate Mnisi (38) is elk op ‘n borgtog van R5 000 vrygelaat. Dié speurders van die Pretoria-Wes polisiekantoor het Maandag op aanklagte van korrupsie en afpersing in die Pretoria-Noord landdroshof verskyn.
Lumka Mahanjana, NVG-woordvoerder, het gesê dat die drie speurders na bewering besig was om ‘n saak teen twee beamptes van die Tshwane Metro Polisiedepartement te ondersoek wat van ontvoering en afpersing verdink word. Op 5 Mei 2026 het hulle glo by ‘n winkelkompleks in Philip Nel Park met een van die klaers vergader en R50 000 aangebied in ruil daarvoor dat die Metro-beamptes nie in hegtenis geneem sou word nie. Die klaers het die voorval daarna met lede van die Suid-Afrikaanse Munisipale Werkersvakbond (SAMWU) bespreek, waarna een van hulle sy prokureur ingelig het, wat die saak by die polisie se Teen-Korrupsie Eenheid aangemeld het. Op 8 Mei het die beskuldigdes na bewering weer kontak met die klaers gemaak en ‘n verdere ontmoeting by Pretoria-Wes-polisiekantoor gereël, waar die bedrag na bewering van R50 000 tot R30 000 onderhandel is. Die Teen-Korrupsie Eenheid het toe op 14 Mei ‘n lokval by ‘n restaurant in Montana uitgevoer, waar die klaers die beskuldigdes ontmoet het. Toe R10 000 na bewering oorhandig is, is die drie speurders op die plek vasgetrek.
Die Staat het nie borgtog teengestaan nie, aangesien die beskuldigdes nie as vlugrisiko’s beskou word nie. Die saak is vir verdere ondersoek na 27 Julie uitgestel.
