KAAPSTAD, WES-KAAP. – Die Stad Kaapstad se direktoraat vir water en sanitasie gaan voort om hulle rioolpompstasie-infrastruktuur te verbeter. Robuuste meganiese filtrasieskerms is onlangs by die Raapenberg-, Lourensrivier- Retreat Main- en Mullerstraat-rioolpompstasies geïnstalleer om te keer dat groot items die afvalwaterstelsel binnedring.
Hierdie inisiatief se doel is om die risiko van oorloop en skade aan die pompstasies te verminder.
Tot op hede is tien van Kaapstad se pompstasies met die spesiale filtrasieskerms toegerus. Die kostes het R8,1 m. beloop. Dit het ongeveer twee jaar geduur.
Installasies by die pompstasies word geprioritiseer op grond van pompblokkasies, bestaande infrastruktuur en beskikbare grond.
Wanneer pompstasies nie optimaal funksioneer nie, veroorsaak dit ’n oormatige lading op die rioolnetwerk wat oorlope by mangate tot gevolg het. Dit veroorsaak geweldige gesondheidsrisiko’s vir mense en die omgewing.
Zahid Badroodien, stadsraadlid van die water-en-sanitasiekomitee sê inwoners moet daarteen waak om wet wipes, sanitêre doekies, babadoeke en klere in toilette af te spoel.
Bron: City of Cape Town
