KWAZULU-NATAL. – ‘n 9-jarige seun is vanoggend kritiek beseer nadat hy uit ‘n woonstel op die tweede verdieping in Helen Josephweg in Davenport, Durban, geval het. Die seun het sowat 20 meter geval en ernstige veelvuldige beserings opgedoen.
Garrith Jamieson van ALS Paramedics sê nooddienste het kort voor 11:30 verskeie oproepe oor die voorval ontvang. Met hul aankoms was die metropolisie se soek-en-reddingseenheid reeds besig om die kind te behandel. Gevorderde lewensondersteuningsparamedici het hom op die toneel gestabiliseer voordat hy vir verdere dringende behandeling na ‘n gespesialiseerde hospitaal vervoer is.
Die omstandighede wat tot die voorval gelei het, is nog onbekend en word deur die polisie ondersoek.
