CENTURION, GAUTENG. – Die naam van die swanger vrou wat Dinsdagmiddag op die N1-Suid naby die Brakfontein-wisselaar in ’n motorongeluk oorlede is, is bekend gemaak. Michelle Nel (30) was ’n gr. 1-onderwyseres by Laerskool Lydenburg.
Die Laevelder berig Nel was op kraamverlof omdat sy in Maart geboorte aan baba Christiaan sou skenk. Na bewering was Nel se ma, Barbara du Plooy, en haar kleuter, Carli (2) saam in die voertuig. Beide het ligte beserings opgedoen en is op die toneel behandel.
Die nooddiensspan, Community Emergency Response Team (CERT), het in hulle verklaring genoem dat een persoon uit die voertuig geslinger is. Na bewering was dit Nel. Sy en die ongebore baba het ernstige beserings opgedoen en is op die toneel dood verklaar.
Daar is nog nie bekend gemaak wie die motor bestuur het of wat die ongeluk veroorsaak het nie. Medelye stroom sedertdien op sosiale media in.
Bronne: Die Laevelder, CERT, Facebook
