GAUTENG. – Die Stad Tshwane het op 7 Januarie ’n privaat kontrakteur aangestel om herstelwerk aan veelvuldige kabelprobleme te versnel en kragtoevoer na East Lynne en Jan Niemand Park te herstel. Die stap is gedoen om die stad se interne kapasiteit te versterk en kragherstel te bespoedig ná aanhoudende foute in die kabelnetwerk. Inwoners het vroeër die week betoog, aangesien die krag reeds meer as twee weke af is.
Volgens ’n mediaverklaring van die Stad Tshwane is die kontrakteur reeds op die terrein en het voorbereidings begin terwyl die aflewering van sowat 1 km nuwe mediumspanningkabels afgewag word om beskadigde kabels te vervang. Stadsamptenare het oornag gewerk en sewe kabelfoute herstel, wat daartoe gelei het dat twee minisubstasies weer aangeskakel is en kragherstel van ongeveer 70% tot sowat 80% gevorder het.
Koedoespoort-substasie oos van die stad het op 26 Desember 2025 ’n elektriese fout ervaar, wat tot ’n brand gelei en kritieke toerusting beskadig het, met gevolglike kragonderbrekings in East Lynne en Jan Niemand Park. “Die aanstel van die kontrakteur het die nodige momentum aan die herstelproses verleen,” sê die Stad.
Die Stad Tshwane sê dit kan nie sê wanneer krag ten volle herstel sal wees nie; verbruikers sal op hoogte gehou word van verdere ontwikkelings.
