KWAZULU-NATAL. – Twee persone is dood tydens ‘n ongeluk wat omstreeks 13:00 vandag op die North Coast-pad, naby Krishnaweg by ‘n vulstasie gebeur het.
Garrith Jamieson van ALS Paramedics sê die enkelvoertuigongeluk het chaos veroorsaak toe die bestuurder van die voertuig onverklaarbaar beheer verloor, verskeie kere gerol en in ‘n vulstasie op sy wiele tot ruste gekom het. Twee mans was in die voertuig. Een van die insittendes is uit die voertuig geskiet en is dood verklaar. Die bestuurder van die voertuig was vasgekeer en is ook dood verklaar.
Jamieson sê die brandweer het met die vasgekeerde oorledene hulp verleen. Omstandighede wat tot die ongeluk gelei het, is onbekend.
Die polisie was op die toneel en is besig met ‘n ondersoek.
