GAUTENG. – Abraham Hercules Engelbrecht (61) en Pieter Stander (60), twee voormalige polisiesersante, is deur die Pretoria-hooggeregshof, sittend in Johannesburg, skuldig bevind aan die voorafbeplande moord op Caiphus Nyoka, ’n Cosas-studenteaktivis. ’n Voormalige bevelvoerder, maj. Leon Louis van den Berg (75), is vrygespreek. Die misdaad het gedurende die apartheidsera plaasgevind.
In ‘n gesamentlike verklaring sê Lumka Mahanjana van die NVG en AO Thatohatsi Mavimbela van die Valke die hof het bevind dat Engelbrecht en Stander in Augustus 1987 ’n plan beraam het om Nyoka te dood. In die vroeë oggendure van 24 Augustus 1987 het hulle saam met ander lede van die SAP se reaksie-eenheid sy kamer binnegestorm, hom geïdentifiseer en nege keer geskiet. Hy is op die toneel dood verklaar.
Tydens die verhoor het die staat vyf getuies geroep, waaronder Alegria en Mothasi Nyoka, Nyoka se twee susters, Gugulakhe Exodus Nyokane, een van die vriende wat in die kamer was, ’n deskundige getuie, dr. Rousseau, ‘n TRC-navorsingsbeampte en lt.kol. Beukman, die ondersoekbeampte. Nadat hierdie getuies getuig het, het die staat sy saak gesluit. Daarna het Van den Berg en een van die ander beskuldigdes ’n aansoek ingevolge artikel 174 gebring waarin hulle beweer het dat die staat geen saak het nie. Die hof het die aansoek van die hand gewys, waarna al die beskuldigdes hul saak gesluit het.
By die uitspraak het die hof bevind dat die staat sy saak bo redelike twyfel teen Engelbrecht en Stander bewys het.
Mahanjana sê die vervolgingsgesag verwelkom die uitspraak en sal die beslissing oor Van den Berg se vryspraak bestudeer. Die saak is tot 11 Desember 2025 uitgestel vir die borgtogaansoek. Engelbrecht en Stander bly in aanhouding.
