GAUTENG. – Johannesburg-metropolisiebeamptes (JMPD) het Donderdag tydens patrollies in Yeoville ‘n Kongolees (41) in verband met die gebeure in die ZanZou-nagklub, in Hatfield, gearresteer.
Brig. Brenda Muridili sê lt. genl. Tommy Mthombeni het die deurbraak in die saak geprys. Die metropolisiebeamptes het die man opgemerk wat soos ‘n uitsmyter in die video van die gebeure lyk. Hy is voorgekeer en nadat hulle tevrede was dat hy wel in die video verskyn, is hy gearresteer. GKS, wat die saak ondersoek, is in kennis gestel. Die verdagte is nou vir gedwonge verkragting, aanranding met die doel om ernstig te beseer en crimen injuria aangekla en word met die twee sake wat by Brooklyn-polisiestasie oopgemaak is, verbind.
Die verdagte sal Maandag op aanklagte in ‘n hof verskyn.
