TOSCA, NOORDWES. – Sewe klaskamers is deur ontevrede inwoners by die Primêre Skool Tosca afgebrand.
Onrus het tussen die inwoners en die departement van onderwys uitgebreek nadat drie klaskamers verlede Dinsdag afgesper is omdat dit glo nie aan die nodige veiligheidsvereistes voldoen het nie.
Nadat inwoners Vrydag probeer het om die skool te sluit, het hulle die klaskamers binnegegaan en dit aan die brand gesteek. Al die klasse het meubels en handboeke ingehad.
Viola Motsumi, LUR vir onderwys, het die voorval veroordeel. Volgens haar is die meeste van die leerlinge se skoolrekords in die brand vernietig.
Die departement het Maandag belowe om binnekort tydelike klaskamers aan die skool beskikbaar te stel.
Bronne: IOL, Times Live
