GAUTENG. – Die vereniging van vroedvroue van Suid-Afrika (Somsa) sê hulle neem kennis van die vonnisoplegging in die saak teen Yolande Maritz-Fouchee, ’n saak wat groot openbare aandag en kommer in die gesondheidsbedryf ontlok het.
Die organisasie sê hulle simpatie gaan uit na almal wat deur die voorvalle geraak is, en erken die emosionele impak wat sulke sake op gemeenskappe, gesondheidswerkers en die publiek se vertroue in die gesondheidstelsel het. Somsa beklemtoon dat veilige, etiese en respekvolle sorg aan moeders en pasgeborenes altyd die kern van gesondheidspraktyk moet wees. Die organisasie sê die saak onderstreep die groot verantwoordelikheid wat op gesondheidswerkers rus, veral dié wat in moeder- en babasorg werk. Daar word verder gewys op die belangrikheid van streng kliniese beheer, etiese optrede en deurlopende professionele ontwikkeling om hoë standaarde in die beroep te handhaaf.
Die vereniging sê privaat vroedvroue speel ’n belangrike rol in die gesondheidstelsel en lewer waardevolle, pasiëntgesentreerde sorg. Hulle waarsku egter dat geïsoleerde voorvalle nie die publiek se vertroue in die breër beroep moet ondermyn nie. Somsa doen ook ’n beroep op vroedvroue om binne die raamwerk van toepaslike regulasies en riglyne te werk, en op instellings en owerhede om stelsels te versterk wat pasiëntveiligheid, aanspreeklikheid en ondersteuning vir gesondheidswerkers bevorder.
Die organisasie sê hulle bly verbind tot die bevordering van hoë standaarde in moeder- en babagesondheid, asook ’n gesondheidsomgewing wat op respek, professionaliteit en etiese verantwoordelikheid gegrond is.
