LIMPOPO. – Vier volwassenes het Vrydag op aanklag van mensehandel in die hof verskyn nadat ses meisies, vier seuns en ‘n vrou Donderdag omstreeks 19:30 deur die polisie op die N1 by die Beitbrug-vragmotorstop in ‘n minibus sonder die nodige dokumente voorgekeer is.
Lt.kol. Stephen Thakeng sê polisielede was besig met roetinepatrollies toe hulle die Toyota Quantum-minibus voorgekeer het. Die drie mans kon wettige dokumente toon, maar nie die vrou en die kinders nie. Met verdere ondersoek is gevind die minibus was van Zimbabwe na Johannesburg op pad. Die bestuurder het glo aan die polisie gesê die kinders gaan hulle ouers in die gebied besoek. Hulle is deur die polisie na Musina se slagofferbemagtigingsentrum geneem, waar hulle veilig gehou is.
Die verdagtes het Vrydag op aanklagte van mensehandel in Musina-landdroshof verskyn. Die vrou (39) het op ‘n addisionele aanklag vir die oortreding van die immigrasiewet voorgekom.
Borgaansoek sal op 18 Desember aangehoor word.
