KWAZULU-NATAL. – ‘n Man in Belvedere, Tongaat, is Woensdagaand kritiek tydens ‘n skietvoorval gewond, terwyl sy vrou oorlede is. Die man het later aan sy wonde beswyk.
Kelsey-Jae Meyrick, woordvoerder van IPSS Medical Rescue, sê rapportering van ‘n skietvoorval in Saunder-singel, Belvedere ontvang.
Met aankoms op die toneel is vasgestel die man het eers die vrou geskiet en daarna homself. Die vrou is op die toneel dood verklaar, maar die man, wat kritiek beseer is, is vir verdere mediese behandeling na ‘n mediese fasiliteit vervoer.
Die toneel is vir ondersoek aan die polisie oorhandig.
Kol. Robert Netshiunda sê die polisie het na die skietvoorval ‘n moord- en geregtelike doodsondersoek geregistreer.
Netshiunda sê die polisie het ‘n vrou met verskeie skietwonde in ‘n plas bloed gevind en dood verklaar. ‘n Man het met ‘n skietwond aan sy kop op die vloer gelê. Hy is na ‘n hospitaal gehaas, maar het later aan sy besering gesterf.
Die motief vir die skietvoorval is tans onbekend, maar Netshiunda sê huishoudelike geweld kan nie uitgesluit word nie.
Volgens Rusa het ‘n kind (10) die voorval aanskou waar die vrou in die oprit by die huis geskiet is. Na bewering het die man opgedaag om die kind op te laai toe ‘n argument glo ontstaan en die skietvoorval plaasgevind het.
