Suid-Afrika verwelkom later in die jaar ‘n aantal opwindende, prominente internasionale handelsmerke.
Onder die nuwelinge is die Britse koffie-kettingwinkelgroep, Pret a Manger, wat later vanjaar in Johannesburg sy deure sal oopmaak. Die Millat Group, wat die eksklusiewe lisensie vir Pret in Suid-Afrika verkry het, beplan om die konsep van organiese en volhoubare kos in Kaapstad, Durban en Pretoria uit te brei.
Die Foschini-groep (TFG) sal teen die einde van 2024 die gewilde Britse sporthandelsmerk JD Sports, na Suid-Afrika bring. TFG beplan om binne die volgende vyf jaar 40 JD-winkels in die land te oop te maak, met produkte van bekende handelsmerke soos Nike en Adidas, sowel as eksklusiewe handelsmerke soos Pink Soda.
In die luuksehotel-kategorie sal Hyde in September 2024 in Rosebank, Johannesburg, oopmaak. Die nuwe hotel sal 131 kamers en ‘n ruim gimnasium hê, met die Proud Mary-restaurant en Workshop17 op die grondvloer.
Verder sal Norse Atlantic Airways vanaf 28 Oktober 2024 vlugte tussen London Gatwick en Kaapstad Internasionaal aanbied. Die laekostelugredery beplan om drie keer per week te vlieg, met tariewe wat begin by £499 (R11,600) vir ekonomiese klas en £1,199 (R27,800) vir Norse Premium-klas.
Tog is daar ook ‘n paar internasionale maatskappye wat Suid-Afrika verlaat. Shell verkoop sy aandeel in Shell Downstream Suid-Afrika, wat 600 petrolstasies insluit, terwyl BNP Paribas sy banklisensie in die land verloor het. Rolex sluit sy amptelike filiaal na sewe dekades, hoewel die handelsmerk steeds aktief sal wees deur sy amptelike kleinhandelnetwerk.
