ISRAEL. – Volgens ‘n Israeliese beampte eis die Israeliese regering dat al 50 gyselaars vrygelaat moet word en het niks gesê oor die skietstilstandvoorstel wat Hamas-leiers aanvaar het nie.
Lees ook: Hamas-leierskap stem in tot nuwe voorstelle vir skietstilstand
Israeliese regeringswoordvoerder David Mencer het aan die BBC gesê die regering “stel nie belang in gedeeltelike ooreenkomste nie”. Hy het gesê: “Dinge het nou verander. Die eerste minister het ’n plan vir die toekoms van Gasa uitgelê”.
Die voorstel waartoe Hamas ingestem het, is ’n 60 dae lange skietstilstand met agt lewende gyselaars wat op dag een vrygelaat word en nog twee lewende gyselaars op dag 50. Die liggame van vyf oorlede gyselaars sal op dag sewe oorhandig word, vyf op dag 30 en agt op dag 60.
In ruil sal Israel 1 500 aangehoudendes van Gasa vrylaat, 150 gevangenes wat lewenslange vonnisse uitdien en 15 gevangenes met vonnisse langer as 15 jaar. Die Israeliese weermag sal ook tydens die skietstilstand onttrek na gebiede van Gasa wat tussen 800 m en 1.2 km van die grens met Israel is.
’n Egiptiese bron het gesê Israel het nog nie formeel geantwoord oor die nuwe voorstel nie, maar ’n beampte in eerste minister Benjamin Netanyahu se kantoor het gesê “Israel se beleid is onveranderd. Israel eis die vrylating van al 50 gyselaars in akkoord met die beleide wat deur die kabinet voorgestel is om die oorlog te eindig.”
Bronne: BBC, EWN, The Straits Times
Lees ook: Hamas-leierskap stem in tot nuwe voorstelle vir skietstilstand
