NOORD-KAAP. – ’n 24-jarige pa is in die Kakamas-streekhof skuldig bevind en gevonnis, nadat hy sy humeur verloor het en sy kleuter (2) aangerand het toe hy die bed natgemaak het. Die kind het kneusplekke, wonde en swelling opgedoen.
Lt.kol. Thabo Litabe sê die pa het op 30 Desember 2022 die kind in die gesig en oor sy hele lyf geslaan, wat verskeie beserings veroorsaak het. Die voorval is die volgende dag by die plaaslike polisiekantoor aangemeld. Die pa is van aanranding met die opset om ernstig te beseer, aangekla en tot vyf jaar gevangenisstraf, opgeskort vir vyf jaar, gevonnis.
Genl.maj. Monica Sebili, ZF Mgcawu-distrikskommissaris, het sers. Jurie Charld Mokgalagadi van Kakamas-GKS vir die deeglike ondersoekwerk geprys wat tot die skuldigbevinding gelei het.
