VRYSTAAT. – Drie leerders tussen die ouderdomme van 14 en 16 jaar is in hegtenis geneem nadat hulle na bewering by ‘n plaaslike laerskool in Reddersburg ingebreek en 11 Samsung-tablette gesteel het.
Lt. Kol. Thabo Covane, provinsiale polisiewoordvoerder, sê die skool se opsigter het Vrydag ontdek dat daar by die biblioteek ingebreek is, waar die skool se elektroniese leertoerusting veilig gebêre word. Om toegang te verkry het die vermeende inbrekers glo ‘n venster stukkend geslaan. Die polisie is onmiddellik ontbied en ‘n opsporingsoperasie is van stapel gestuur. Al drie verdagtes is kort daarna in hegtenis geneem en 11 van die gesteelde Samsung-tablette, met ‘n gesamentlike waarde van ongeveer R27 500, is herwin. Sewe tablette is egter nog nie opgespoor nie en speurders volg tans leidrade op om die oorblywende eiendom terug te kry.
Die minderjariges is ingevolge die Kinderwet 38 van 2005 in die sorg van hul ouers of voogde vrygelaat. Hulle sal op 19 Mei in die Reddersburg-landdroshof verskyn.
