WES-KAAP. – ’n Nuwe, minder indringende behandeling vir sekere skildklierknoppe is Woensdag vir die eerste keer in Afrika by die Groote Schuur-hospitaal in Kaapstad uitgevoer.
Cape Town Interventional Radiology (CTIR), UCT Interventional Radiology en Groote Schuur-hospitaal het die eerste mikrogolf-skildklierablasieprosedure in Afrika met die Terumo TATO-mikrogolfablasieplatform uitgevoer. Die prosedure is onder leiding van dr. Gibran Timothy Yusuf van die Verenigde Koninkryk uitgevoer as deel van die ontwikkeling van plaaslike kundigheid in minimaal indringende skildklierbehandeling. Die diens word vir geskikte staatsektor-pasiënte by Groote Schuur-hospitaal ontwikkel. Mikrogolfablasie kan vir sekere pasiënte met goedaardige skildklierknoppe ’n alternatief tot tradisionele chirurgie bied, met ’n minimaal indringende prosedure, behoud van skildklierfunksie en ’n korter hersteltyd.
Die projek fokus ook op vaardigheidsoordrag en die ontwikkeling van plaaslike kundigheid, met die doel om ’n toekomstige sentrum van uitnemendheid en opleidingsplatform vir skildklierablasie in Suid-Afrika en Afrika te vestig.
