LIMPOPO. – De Beers het aangekondig dat produksie by sy Venetia-diamantmyn in Limpopo vir die volgende twee jaar opgeskort gaan word, weens die aanhoudende swak toestand van die internasionale diamantmark. Volgens die maatskappy vorm die besluit deel van sy plan om koste te besnoei en die onderneming vir die toekoms sterker te posisioneer.
Sowat 40% van Suid-Afrika se jaarlikse diamantproduksie en ongeveer 10% van De Beers se wêreldwye produksie word deur die Venetia-myn gelewer. Die myn is in die afgelope dekade omskep van ‘n oopgroefmyn na ‘n ondergrondse myn wat na verwagting tot minstens 2046 in bedryf sou wees.
Die aankondiging het ook kommer oor moontlike werksverliese laat ontstaan. Meer as 1 000 poste kan volgens die Nasionale Mynwerkersunie (NUM) in gedrang wees. De Beers het die konsultasieproses ingevolge artikel 189 begin, hoewel die maatskappy nog nie ‘n finale getal bevestig het nie.
De Beers sê die myn, Suid-Afrika se grootste diamantmyn, sal steeds in kritieke infrastruktuur vir die ondergrondse projek belê, maar kapitaalbesteding sal oor ‘n langer tydperk versprei word. Die doel is om produksie weer op te skerp wanneer marktoestande verbeter. Die maatskappy het bevestig dat hy met werknemers en ander belanghebbendes in gesprek is en dat ondersteuning aan werknemers wat deur die besluit geraak word, gebied sal word.
Volgens De Beers is die besluit geneem nadat die wêreldwye mark vir ruwe diamante vir ‘n lang tyd onder druk was. Swakker vraag, veral uit China, en groter mededinging van laboratorium-vervaardigde diamante het pryse laat daal en die maatskappy genoop om verdere kostebesparings in te stel.
Bronne: De Beers, Financial Times, Business Day en Mining Weekly
