GAUTENG. – Lede van ’n beweerde internasionale swendelsindikaat het op aanklagte van die oortreding van die Wet op Finansiële Advies en Tussengangerdienste (Fais) in die Johannesburg Kommersiële Misdaadhof verskyn. Die verdagtes is Dinsdag in onderskeidelik Bryanston, Randburg en Centurion, tydens ‘n opoerasie van ’n multi-agentskap, gelei deur die Valke, in hegtenis geneem. Meer as 40 slagoffers wêreldwyd was die teikens.
Volgens NVG-streekwoordvoerder Phindi Mjonondwane het die verdagtes na bewering onwettig oproepsentrums bedryf wat finansiële dienste aangebied het, sonder registrasie by die finansiële sektor gedragsowerheid. Meer as 40 slagoffers uit die VSA, Australië, Nieu-Seeland en die VK is glo uit meer as R1 miljard bedrieg. ’n Deel van die geld is gebruik om die oproepsentrums aan die gang te hou.
Die saak is vir die borgtogverhoor tot 4 Februarie uitgestel.
