Brekende Nuus
Nuus

KYK: Kaapstad stel vlak 1-waterbeperkings vanaf 1 Desember in

Foto: Ter illustrasie

WES-KAAP. – Die Kaapstad-metro stel op 1 Desember 2026 vlak 1-waterbeperkings in en vra inwoners, besoekers en ondernemings om minstens 10% minder water te gebruik. Die stad het die maatreëls Maandag 16 November aangekondig nadat die nasionale departement van water en sanitasie bevind het dat beperkings vir gebruikers van die Wes-Kaapse watervoorsieningstelsel nodig is.

Kaapstad se damvlakke het op 16 November op 70,4% gestaan. Die stad se waterverbruik het tydens die onlangse warm weer tot 951 miljoen liter per dag gestyg, teenoor sy mikpunt van 860 miljoen liter.

Leonardo Manus, uitvoerende direkteur vir water en sanitasie by die  Kaapstad-metro, sê die stad wil die vraag na water vroeg beperk om die risiko van strenger maatreëls later te verminder. Die stad vra inwoners om as riglyn na hoogstens 85 liter per persoon per dag te mik, met wasgoed, skoonmaak, kosmaak en persoonlike higiëne daarby ingereken.

Wat geld vanaf 1 Desember?

  • Tuine mag slegs op Dinsdae en Saterdae voor 09:00 of ná 18:00 met munisipale drinkwater natgemaak word, vir hoogstens een uur per dag. Dit geld vir sproeiers, drupbesproeiing, handslange met snellerbeheerde spuitkoppe, emmers en gieters.
  • Sportvelde en openbare parke mag op Dinsdae en Vrydae voor 09:00 of ná 18:00 vir hoogstens een uur per dag met sproeiers besproei word.
  • Plaveisel en ander harde oppervlaktes mag nie met ’n tuinslang afgespuit word nie.
  • Swembaddens mag gevul of aangevul word, maar moet bedek wees wanneer hulle nie gebruik word nie. Waar dit prakties moontlik is, moet reënwater vir aanvulling gebruik en terugspoelwater herwin word.
  • Private en informele motorwasserye mag emmers of hoëdruktoerusting met lae waterverbruik gebruik. Kommersiële motorwasserye moet waterbesparingsnorme volg en minstens 50% van die water wat hulle gebruik, herwin.

Die stad se permanente waterreëls bly van krag. Dit sluit die reël in dat boorgat- en putpuntwater slegs voor 09:00 of ná 18:00 vir tuinbesproeiing gebruik mag word.

Druk hier om meer te lees.