GAUTENG. – Hercules-polisiestasie het lasbriewe vir die inhegtenisname van Rudie Lubbe en Chantelle Oosthuizen bekom. Hulle word gesoek in verband met die voormalige hoogspringkampioen, Jacques Freitag (42), se dood.
Lubbe en Oosthuizen word deur klagtes van moord en sameswering tot moord in die gesig gestaar. Hulle vlug vermoedelik van die gereg.
Freitag was vermis en sy liggaam is op 1 Julie naby Zandfontein-begraafplaas in Andeon, in die Hercules-polisiëringsarea, ontdek.
Enigiemand met inligting oor waar Lubbe en Oosthuizen hulle bevind, word versoek om speur.kapt. Martin Smith by 082 778 9385 te bel.
Nuusflits het voorheen soos volg berig:
Jacques Freitag (42), die voormalige hoogspringkampioen wat vermis was, se liggaam is naby Zandfontein-begraafplaas in Andeon in die Hercules-polisiëringsarea gevind.
Brig. Brenda Muridili het aan Nuusflits bevestig die vermistepersoonsaak is na moord verander. Freitag se liggaam is Maandagmiddag deur die polisie se soek-en-reddingspan gevind. Die span het plaaslike polisielede, die lugvleuel en watervleuel ingesluit.
Muridili sê die liggaam moet nog formeel deur die familie uitgeken word.
Niemand is in hegtenis geneem nie, maar die polisie volg alle leidrade op.
Freitag was sedert 12 Junie vermis.
Chrissie Lewis, Freitag se suster, het op sosiale media bekendgemaak dat hy vermis is: “With sadness to say. We have to report that my brother JACQUES FREITAG is MISSING. LAST SEEN ALIVE 12 JUNE. He has been dropped off in a bush in BOOYSENS Pretoria West. PLEASE. If there is any info please contact me at 0796140996.”
ICE Community Network sê Freitag is by sy ma se huis in Bronkhorstspruit opgelaai en by ‘n gastehuis in Booysens, Pretoria, afgelaai. Freitag, wat in Bronkhorstspruit grootgeword het, is een van net 10 atlete wat die wêreldtitel op o.19, o.20 en as senior kon wen.
