GAUTENG. – Koketso Moeka, ’n 36-jarige ma van Mamelodi, het op 23 April in die Mamelodi-streekhospitaal geboorte geskenk aan ’n drieling, twee seuns en ’n dogter. Sy het eers in die hospitaal met die bevalling uitgevind dat sy drie babas verwag.
Volgens ‘n sosialemediaplasing van die hospitaal het die onverwagse nuus haar geskok en verward gelaat, maar hospitaalpersoneel het vinnig emosionele ondersteuning gebied. ’n Sielkundige by die hospitaal is ook ingeroep om haar te help om die geboorte en skoknuus te verwerk.
Moeka is tans werkloos en moet nou ses kinders versorg nadat die drieling by die gesin aangesluit het. Sy het ’n beroep op die publiek gedoen vir hulp en skenkings om haar te ondersteun.
Enigeen wat die ma en kinders wil ondersteun, kan met die hospitaal se maatskaplike dienste kontak maak. Die nommers is op die oorspronklike plasing te kry.
