LIMPOPO. – ’n Vrou (25) het Vrydag in verband met die moord op haar tweejarige dogtertjie in die Seshego-landdroshof verskyn.
Kol. Malesela Ledwaba, polisiewoordvoerder, sê in ‘n verklaring die polisie is Donderdag omstreeks 09:20 na die huis van die slagoffer in Jupiterdorp, Ga-Mashashane, ontbied. Met aankoms by die huis het familielede die polisie na die kind gelei wat “bewusteloos” op ‘n bed gelê het. Nooddienste is ontbied en die kind is dood verklaar.
’n Voorlopige ondersoek het tot die kind se ma se inhegtenisneming gelei. Sy het Vrydag op aanklag van moord in die hof verskyn. Die saak is vir ‘n formele borgtogaansoek tot 1 Augustus uitgestel.
