LIMPOPO. – ‘n Tweede verdagte is in hegtenis geneem vir die moord op Attie Mahne (77). Hendrik Chimole (28) die eerste verdagte in die saak, het reeds Woensdag in die Senwabarwana-landdroshof verskyn. Die tweede verdagte is Chimole se broer, wat ‘n werknemer van die Mahnes was. Saterdagaand se aanval op die plaas Cosmopolite, in Baltimore, het Mahne se lewe gekos. Pietro, sy vrou, is met beserings in die Ellisras-hospitaal opgeneem.
Gawie Louwrens van Bosveld Misdaad Ondersoeke sê in ‘n sosialemediaplasing dié diens se ondersoekers het die plaasmoord verder ondersoek en saam met Tolwe-speurders, Mokopane-speurders, Mokopane-misdaadintelligensie en Bowveld Farm-veiligheidsdienste inligting nagegaan. Die tweede verdagte is vanoggend (Donderdag) kort voor 03:00 in die Matladi-woonbuurt, Shongoane 2, in hegtenis geneem. Hy is by die Tolwe-polisiekantoor aangehou.
Intussen sê kol. Malesela Ledwaba verskeie items, wat ‘n vuurwapen insluit, is in die aanval gesteel. Tydens Chimole se inhegtenisneming is daar op Mahne se gesteelde .38 Special-rewolwer en ses rondtes lewendige ammunisie beslag gelê. Chimole bly ná sy eerste hofverskyning in aanhouding. Die saak is tot vandag (Donderdag) vir regsverteenwoordiging uitgestel. Hy sal vandag in die Tolwe- periodieke landdroshof voorkom.
