OOS-KAAP. – Julius Malema, die EFF-leier en LP, het Vrydag vir voorvonnisverhoor in die Oos-Londen-landdroshof verskyn. Die saak is vir betoog oor verswarende en versagtende omstandighede tydens vonnisoplegging tot 15 en 16 April uitgestel.
Luidens ‘n verklaring deur NVG-woordvoerder, Luxulo Tyali, volg die uitstel ná die voorlegging van ’n voorvonnisverslag deur ’n maatskaplike werker wat deur die verdediging aangestel is en deur die staat gekruisondervra is. Malema is in Oktober 2025 skuldig bevind aan onder meer die onwettige besit van ’n vuurwapen en ammunisie, die afvuur van ’n vuurwapen in ’n beboude gebied, versuim om redelike voorsorg vir persone of eiendom te tref, asook roekelose blootstelling van persone of eiendom aan gevaar.
Tyali het voorts gesê die staat sal, ten spyte van die aanbeveling vir ’n boete of opgeskorte vonnis, gevangenisstraf aanvra wanneer daar oor die vonnis geargumenteer word.
