LIMPOPO. – ’n Man (35) is deur die Mankweng-polisie in hegtenis geneem nadat hy na bewering Vrydagaand sy voormalige vriendin en haar 13 maande oue babadogter met ’n bakkie omgery het. Die baba is later aan haar beserings oorlede, terwyl die ma beseer is.
Kol. Malesela Ledwaba, polisiewoordvoerder, sê in ‘n verkaring volgens inligting het die ma en haar kind omstreeks 20:00 langs die pad vir ‘n taxi gewag. Haar voormalige kêrel het daar aangekom en ’n hewige argument het ontstaan. Toe ’n taxi opdaag, het sy en haar baba in die voertuig geklim. Die taxibestuurder het haar glo onderweg meegedeel dat ’n bakkie die taxi volg. Hulle het by Marothi-kruising afgeklim, waarna die verdagte, wat die bakkie bestuur het, glo teen ’n hoë snelheid oor haar en die kind gery het sonder om te stop.
Beide slagoffers is met ernstige beserings na die Mankweng-hospitaal geneem. Die baba is later oorlede, terwyl die ma beserings aan haar been opgedoen het.
’n Saak van moord en poging tot moord is geopen. Die verdagte sal vandag in die Mankweng-landdroshof verskyn. Die ondersoek duur voort.
