VRYSTAAT. – Menslike oorskot, die onderlyf van vermoedelik ’n pasgebore baba, is Woensdag deur ‘n gemeenskapslid in ‘n donga gevind. Die Phuthaditjhaba-polisie doen ’n beroep op die gemeenskap vir hulp nadat die ontdekking gemaak is.
AO Mmako Mophiring, polisiewoordvoerder, sê in ‘n verklaring die ontdekking is in die Boiketlong-seksie van Mabolela-dorp in Qwaqwa gemaak. Die persoon wat die ontdekking gemaak het, het onmiddellik die polisie in kennis gestel. Die bolyf van die liggaam kon nie opgespoor word nie en daar word vermoed dat dit moontlik deur honde verskeur is.
’n Saak van verberging van geboorte is geopen en die ondersoek duur voort. Enigiemand met relevante inligting word gevra om 072 564 3200 te bel.
