OOS-KAAP. – KZN VIP Protection Services bevestig vier lyfwagte/taktiesebeamptes is op 20 Februarie deur die polisie doodgeskiet. Die Onafhanklike Polisie-ondersoekdirektoraat (Opod) ondersoek die insident.
Dié diens sê in ‘n verklaring die beamptes het hulle lewens tydens polisie-aksie in die Butterworth-gebied verloor. Die omstandighede van die insident kan nie bevestig word nie. KZN VIP Protection Services sê die rede is dat die polisie teenstrydige verklarings vrygestel het en dit tot onakkurate mediaverslaggewing gelei het.
“Sommige verslae het ons beamptes verkeerdelik bestempel as verdagtes wat betrokke was by ‘n transitorooftog en hulle daarvan beskuldig dat hulle ongelisensieerde vuurwapens besit.”
Dié diens wil dit duidelik stel: die video’s en foto’s van die insident wat op sosiale media versprei word, beweer die teenoorgestelde.
“Ons bly hoopvol dat dit sal help om die onskuld van ons lede te bewys. In die lig van hierdie tragiese gebeurtenis het die Onafhanklike Polisie Ondersoekdirektoraat (Opod) ‘n moordondersoek geopen, wat tans aan die gang is.”
Enigiemand met relevante inligting word versoek om na vore te kom en kan selfs vertroulike wenke aan 067 594 6697 WhatsApp.
KZN VIP Protection Services bedank die ondersteuning wat hulle tans ontvang.
Nuusflits het kommentaar van Opod gevra.
Lees meer hier onder:
