GAUTENG. – Die polisie het dissiplinêre stappe begin teen ‘n polisiekonstabel wat glo by ‘n omkoopvoorval betrokke was, nadat ‘n video daarvan op sosiale media versprei is. Nuusflits het vroeër berig oor die video waarin gesien kan word hoe ‘n polisiekonstabel geld aan André Snyman van eblockwatch teruggee.
Volgens polisiewoordvoerder, kapt. Tintswalo Sibeko, is die beampte reeds geïdentifiseer en onmiddellike interne optrede is ingestel. ’n Departementele ondersoek is ook geloods om presies vas te stel wat gebeur het. In die video, wat veral op Facebook versprei word, word die beampte in volle uniform gesien waar sy glo geld aan ’n lid van die publiek teruggee ná ’n beweerde omkoopvoorval. Die polisie bevestig dat daar ‘n nul-verdraagsaamheidsbenadering teen korrupsie gehandhaaf word en dat die aanvaar of versoek van omkoopgeld ’n ernstige oortreding is wat strafregtelike gevolge kan hê.
Lt.genl. Tommy Mthombeni, die provinsiale polisiekommissaris, het die beweerde optrede sterk veroordeel en gesê beamptes wat hul mag misbruik of die publiek se vertroue skaad, sal beslissend hanteer word. Hy het bygevoeg dat alle bewerings van korrupsie deeglik ondersoek sal word en dat gepaste dissiplinêre en strafregtelike stappe geneem sal word waar nodig.
Lede van die publiek word aangemoedig om nie omkoopgeld aan te bied nie en enige gevalle van korrupsie of afpersing deur polisiebeamptes aan te meld. Die polisie sê hy bly daartoe verbind om korrupsie binne sy geledere uit te roei en professionele, verantwoordbare polisiëring te verseker.
Rapporteringskanale:
• SAPD Anti-korrupsie blitslyn: 0800 701 701
• SAPD Nasionale Klagtesentrum: 0800 333 177
• Corruption Watch WhatsApp: 072 013 5569
• Gauteng Diensklagtes (bystand): 082 442 2000
• Onafhanklike Polisie Ondersoekdirektoraat (Opod)
