NOORDWES. – Jack Motlhabya (37), Menzi Shabalala (38), Ntuthuko Dladla (40) en Samkelo Mbotho (38) het Woensdag in die hof verskyn na hulle glo ‘n onwettige myner van Stilfontein, genaamd Tiger, gehelp ontsnap het.
Sivenathi Gunya, woordvoerder vir die NVG, sê die beskuldigdes, verbonde aan die nasionale intervensie-eenheid (NIU), staan op aanklagte van regsverydeling en hulp aan ‘n aangehoudene om te ontsnap in die Stilfontein-landdroshof tereg.
Verskeie onwettige myners is op 15 Januarie uit ‘n mynskag in Stilfontein gered en na die oppervlak gebring. Die onwettige myners is deur polisielede wat dienste vir operasie Vala Umgodi verrig het, gearresteer. “Tiger” is deur verskeie onwettige myners as die persoon wat ondergronds in beheer was, geïdentifiseer. Die beskuldigde het op die dag van sy inhegtenisneming ontsnap, waarna ‘n ondersoek deur die teenkorrupsie-eenheid geloods en die vier polisielede op 31 Januarie gearresteer is. Hulle het op dieselfde dag in die hof verskyn, waarna elkeen op R1 000 borg vrygelaat is.
Die vier beskuldigdes se verhoor vir verdere ondersoek tot die volgende hofverskyning op 29 Mei uitgestel. Die beskuldigdes is steeds op borg.
