GAUTENG. – Ses verdagtes is Donderdag op aanklagte van afpersing in hegtenis geneem en sal vandag in die Ga-Rankuwa-landdroshof voorkom. Die polisie het meer as R46 000 wat glo in hulle besit was, gekonfiskeer.
Lt.kol. Mavela Masondo sê ‘n intelligensie-gedrewe operasie is geloods na verdagtes wat na bewering geld van buitelandse winkeleienaars in Akasia en Soshanguve afgepers het. Die gekonfiskeerde bedrag is binne ses uur deur die verdagtes ingevorder.
“Op ’n vraag waarvoor die geld is, het die verdagtes beweer dit was vir die veiligheid van die winkeleienaars.”
Die polisie het die verdagtes vir ‘n paar uur dopgehou, en waargeneem hoe hulle met twee voertuie by verskeie winkels stop en die eienaars nader. Toe die polisie ingryp, is die geld in hul besit gevind.
“Die polisie doen ‘n beroep op al die winkeleienaars wat slagoffers van dié afpersingsindikaat was, om na vore te kom en kriminele sake te open,” het lt.kol. Masondo gesê.
