MPUMALANGA. – Sowat 480 vermeende onwettige mynwerkers, insluitend vier minderjariges, het Maandag op aanklagte van onder meer oortreding van die immigrasiewet, diefstal van gouddraende materiaal en betreding in die Barberton-landdroshof verskyn. 83 van die beskuldigdes is elk op R2 000 borgtog vrygelaat, nadat hulle adresse bevestig is.
Monica Nyuswa, NVG-woordvoerder, sê die beskuldigdes wat op borgtog vrygelaat is, het geen vorige veroordelings of uitstaande sake teen hulle nie. Die res bly in aanhouding. Die beskuldigdes is op 1 Augustus tydens ’n gesamentlike operasie by die Sheba-myn in hegtenis geneem. Operasie Vala Umgodi is daarop gemik om onwettige mynbousindikate uit te roei. Die saak is tot 11 en 12 Augustus uitgestel vir verdere adresverifikasie en moontlike borgtogaansoeke en van 18 tot 19 Augustus vir formele borgtogaansoeke vir beskuldigdes wat onwettig in die land is of uitstaande sake het.
Die saak is verder tot 2 September uitgestel vir die staat om die saakdossier aan die verdediging bekend te maak.
