GAUTENG. – Die uitleweringsverrigtinge teen Ndodana Mkhanyisi Tshuma (46), wat in Brittanje op drie aanklagte van moord gesoek word, is tot 7 Desember uitgestel. Die Johannesburgse landdroshof het die uitstel toegestaan sodat die proses vir wedersydse regshulp afgehandel kan word en Tshuma se pleit- en-vonnisverrigtinge in ’n afsonderlike vuurwapen-en-ammunisiesaak afgehandel kan word. Dié verrigtinge is vir 10 November geskeduleer.
Magaboke Mohlatlole, NVG-woordvoerder, sê die Britse owerhede het Suid-Afrika om wedersydse regshulp versoek om elektroniese toestelle wat op Tshuma beslag gelê is, te bekom. Die minister van justisie het die versoek ingevolge die Wet op Internasionale Samewerking in Strafsake, Wet 75 van 1996, gemagtig. Die hof het die aansoek toegestaan en die selfoon sal aan die Britse owerhede oorhandig word om hul ondersoek na die moordklagte te ondersteun.
Tshuma het volgens die NVG ’n pleit-en-vonnisooreenkoms met die staat ingevolge artikel 105A van die Strafproseswet aangegaan. Hy het ingevolge dié ooreenkoms skuldig gepleit op aanklagte wat verband hou met die onwettige besit van ’n vuurwapen en ammunisie, asook die oortreding van die Immigrasiewet.
Britse owerhede soek Tshuma in verband met die beweerde moord op sy vrou, Nothabo Zandile Tshuma, en hul twee kinders, Natalie en Nala Tshuma. Die drie moorde het na bewering vroeg in Julie 2026 in Bedford, Bedfordshire, plaasgevind.
Die NVG sê hy is gereed om met die uitleweringsverrigtinge voort te gaan en verbind hom daartoe om die saak so spoedig moontlik en binne die raamwerk van die reg af te handel.
