KWAZULU-NATAL. – ’n Meisie (5) is vroeër vandag (Maandag) buite haar huis in Hilltop deur elektrisiteit geskok en in ‘n kritieke toestand na ‘n hospitaal geneem.
Reacton Unit South Africa (Rusa) sê in ‘n sosialemediaverklaring verskeie eenhede is vir hulp na die toneel ontbied. Met aankoms is die kind na ’n nabygeleë grondpad geneem waar noodvoertuie toegang kon verkry. Ooggetuies het aan Rusa-beamptes vertel die meisie en haar broer (12) was alleen tuis tydens die voorval.
Die kind het glo met ’n glas water gestruikel en oor ’n onwettige elektrisiteitsverbinding en op oop drade geval. Bure het haar bewusteloos aangetref en die Rusa-beheersentrum vir hulp bebel.
Noodpersoneel het die meisie op die toneel gestabiliseer voordat sy vir verdere behandeling na ’n plaaslike hospitaal geneem is.
