LIMPOPO. – Die dodetal in ’n botsing tussen ’n Toyota Quantum en ’n bus wat leerlinge vervoer het, het tot vier gestyg nadat ’n derde meisieleerling aan haar beserings beswyk het. Altesaam 51 leerlinge is vir beserings behandel.
Die departement se woordvoerder, Mashudu Mabata, sê die beseerde leerlinge is vir behandeling na die Polokwane Provinsiale Hospitaal en Mediclinic Polokwane geneem. Die trompop botsing het Donderdagoggend op die pad tussen Jupiter en Diana in die Mashashane-gebied plaasgevind. Twee meisieleerlinge en een bestuurder is aanvanklik op die toneel dood verklaar, waarna die derde leerling op pad na Polokwane beswyk het. Die oorsaak van die ongeluk word steeds ondersoek, met roekelose en nalatige bestuur van die faktore wat ondersoek word.
Die pad, wat tydelik gesluit was, is skoongemaak en weer vir verkeer oopgestel.
