GAUTENG. – Die nasionale vervolgingsgesag (NVG) se batebeslagleggingseenheid het suksesvol ’n hofbevel verkry om bates ter waarde van sowat R43,9 miljoen te bevries, in ’n groot internasionale bedrogsaak wat met vals oproepsentrums in Bryanston, Johannesburg verbind word. Slagoffers is glo onder meer in Australië, Nieu-Seeland, Kanada en die Verenigde State bedrieg.
Kaizer Kganyago, NVG-woordvoerder, sê die operasie volg ná die inhegtenisneming van verdagtes wat glo deel is van ’n wêreldwye swendelnetwerk. Volgens Kganyago het die groep hul slagoffers mislei deur glo vals beleggingsgeleenthede aanlyn te adverteer en mense te oorreed om geld in nie-bestaande produkte te belê met beloftes van hoë opbrengste. Sogenaamde “scammers” het spesifiek kwesbare individue geteiken en hulle stelselmatig oortuig om groot bedrae geld oor te dra. Luukse eiendomme in Gauteng en ’n vloot duur voertuie, onder meer Mercedes-Benz-, Aston Martin-, Volkswagen-, Toyota- en Jaguar-modelle, is van die bates wat bevries is. Die beslaglegging vorm deel van ’n poging om die opbrengs van misdaad terug te neem van die netwerk.
Die saak duur in die Palm Ridge-landdroshof voort en is vir verdere ondersoek tot 4 Junie uitgestel.
