GAUTENG. – Ayanda Dludla (22), die bestuurder van ’n voertuig wat skoolleerlinge vervoer het, het Woensdag sy borgtogaansoek in die Vanderbijlpark-landdroshof laat vaar. Hy het op 14 aanklagte van moord, drie van poging tot moord, die bestuur van ‘n voertuig sonder ‘n geldige geskiktheidsertifikaat, sowel as ‘n professionele bestuurslisensie en die bestuur van ‘n ongelisensieerde voertuig in die hof verskyn.
Luidens ‘n verklaring van Lumka Mahanjana, NVG-woordvoerder, word daar beweer Dludla het op 19 Januarie ’n leerlingvervoer-voertuig op die R553 Golden Highway bestuur met 16 leerders as insittendes. Hy het na bewering met die voertuig kop-aan-kop met ‘n aankomende vragmotor gebots. Die botsing het gelei tot die dood van 14 leerlinge, terwyl nog twee leerlinge en ‘n insittende van die vragmotor beserings opgedoen het.
Die saak is vir verdere ondersoek tot 5 Maart uitgestel.
