LIMPOPO. – Die verhoor van ’n 28-jarige man wat daarvan beskuldig word dat hy twee verpleegsters van die Ga-Chuene-kliniek verkrag en verskeie ander ernstige misdade gepleeg het, is tot 22 Oktober in die Polokwane-hooggeregshof uitgestel. Die uitstel volg nadat die verdediging se regsverteenwoordiger weens die voortgesette staking by Regshulp Suid-Afrika nie beskikbaar was nie. Die beskuldigde bly in aanhouding.
Mashudu Malabi-Dzhangi, NVG-woordvoerder, sê die man staan tereg op aanklagte van poging tot moord, die besit van ’n ongelisensieerde vuurwapen en ammunisie, die rig van ’n vuurwapen, twee aanklagte van ontvoering, vyf van verkragting, ses van huisbraak met die opset om ’n misdryf te pleeg en sewe van roof met verswarende omstandighede. Sy identiteit word weerhou om ’n minderjarige klaer in een van die verkragtingsaanklagte te beskerm.
Volgens die NVG hou die aanklagte verband met voorvalle wat na bewering tussen Desember 2024 en Januarie 2025 in die dorpe Ga-Chuene en Ga-Maja plaasgevind het. Die man het na bewering vroue se huise binnegegaan, inwoners met geweld gedreig en waardevolle items, waaronder selfone, skootrekenaars en geld, geëis. Hy word ook daarvan beskuldig dat hy minderjariges seksueel aangerand het.
Die NVG sê die beskuldigde het na bewering veiligheidspersoneel by die Ga-Chuene-kliniek met ’n vuurwapen gedreig en hulle geboei voordat hy twee verpleegkundiges ontvoer het. Hy het hulle glo na nabygeleë bosse geneem, waar hy hulle na bewering verkrag en van hul selfone beroof het. Die slagoffers kon later na die kliniek terugkeer. Die ondersoek het die man met die misdade verbind terwyl hy reeds in aanhouding was in verband met ’n onverwante saak.
