KWAZULU-NATAL. – Vier verdagte rowers, moordenaars en afpersers is vroeër vandag (Donderdag) in Duffsstraat, langs Dumisani Makhayerylaan in KwaMashu, in ‘n skietery met die polisie dood.
Lt.kol. Paul Magwaza sê die verdagtes is in ‘n voertuig deur die polisie in Larkstraat onderskep. Die verdagtes het glo na die polisie geskiet, waarop die polisie teruggeskiet het. Tydens die skietery is drie verdagtes doodgeskiet. Met ‘n soektog in die omgewing van die misdaadtoneel het die polisie die liggaam van ‘n vierde verdagte, wat probeer vlug het en skietwonde opgedoen het, aangetref.
Magwaza sê drie vuurwapens is in die besit van die verdagtes gekry. Geen polisielid is tydens die skietinsident beseer nie.
“Die verdagtes sal geprofileer word om te sien of hulle met ander misdade verbind word. Die verdagtes is vir talle moorde, rooftogte en afpersingsake in die Ethekwini-distrik gesoek.”
