OOS-KAAP. – Estelle le Grange (57) is deur die Gqeberha-hooggeregshof tot 25 jaar direkte gevangenisstraf gevonnis nadat sy skuldig bevind is aan die moord en roof op haar lewensmaat, Daniel de Jager (65). Haar vonnis volg nadat haar twee medepligtiges, Anke-Mari Cilliers (39) en Lee-Roy Scholtz (38), reeds vroeër skuldig gepleit en gevonnis is vir hul rol in die misdaad.
NVG-woordvoerder, Luxolo Tyali, sê die saak spruit uit ’n goed beplande komplot wat gelei het tot die moord op De Jager by sy huis in Newton Park in Oktober 2025. Volgens hofgetuienis het Le Grange die ander twee beskuldigdes herhaaldelik gevra om haar te help om die slagoffer om die lewe te bring.
Die hof het gehoor dat die drie op die aand van die voorval hul plan gefinaliseer het en besluit het om die moord as ’n roof te laat lyk. Le Grange het instruksies gegee oor hoe die aanval uitgevoer moes word en het toegang tot die huis moontlik gemaak. Nadat bevestig is dat De Jager slaap, het Scholtz en Cilliers die huis binnegegaan en hom in sy slaapkamer aangeval. Ná die moord is die toneel verander om soos ’n inbraak te lyk, waarna items soos ’n voertuig, juweliersware, bankkaarte en ’n skootrekenaar gesteel is. Geld is ook kort daarna uit De Jager se rekening onttrek.
’n Nadoodse ondersoek het bevestig dat De Jager aan ernstige kopbeserings en ’n snywond aan die nek beswyk het. Verdere bewyse het uitgebreide kommunikasie tussen die beskuldigdes voor, tydens en ná die misdaad blootgelê, wat die beplanning daarvan bevestig het.
Benewens die 25 jaar vir moord, is Le Grange ook gevonnis vir roof met verswarende omstandighede, dwarsboming van die gereg en oortreding van die wet op ouer persone. Die hof het gelas dat hierdie vonnisse saam uitgedien word. Die NVG het die uitspraak verwelkom en gesê dit beklemtoon dat oortreders aanspreeklik gehou sal word, veral in sake waar weerlose slagoffers geteiken word.
