WES-KAAP. – Twee mans is Donderdagaand in Knysna doodgeskiet, terwyl die polisie ook ondersoek instel na die skietery waarin die voormalige burgemeester en wyk 8-raadslid Aubrey Ndoda Tsengwa Woensdagaand dood is. Die voormalige wyk 7-raadslid Mandla Matiwane is een van die mans wat Donderdag doodgeskiet is.
Brig. Novela Potelwa, polisiewoordvoerder, sê die twee mans, onderskeidelik 47 en 48 jaar oud, was omstreeks 21:00 in ’n voertuig in Bongani toe onbekende gewapende aanvallers op hulle losgebrand het. Geen inhegtenisnemings is tot dusver gemaak nie. Die polisie ondersoek of die twee skietvoorvalle met mekaar verband hou. Die ondersoekspan van ernstige geweldsmisdaad is versterk om albei sake te ondersoek.
Knysna-munisipaliteit het intussen Tsengwa se dood op 19 Augustus bevestig. Die munisipaliteit het hom as ’n gerespekteerde gemeenskapsleier beskryf. Die munisipaliteit het ook bevestig dat voormalige wyk 7-raadslid Mandla Matiwane Donderdag 20 Augustus doodgeskiet is. Matiwane het van 2016 tot 2021 as ANC-raadslid gedien.
Enigiemand met inligting wat die ondersoek kan help, kan sers. Nobuntu Thundezwa by 082 522 1251 bel.
