GAUTENG. – Jacques Freitag, die voormalige wêreldkampioen in hoogspring, se moordsaak het weer op 4 Julie in die Pretoria-streekhof voorgekom. Rudie Lubbe (52), een van die beskuldigdes in die saak, se borgtogaansoek is weer deur die hof geweier. Freitag, wat aanvanklik vermis was, se liggaam is in Junie 2023 met verskeie skietwonde in Pretoria gevind.
Mike Bolhuis van SSS Specialist Investigators sê alhoewel die staat die borgtogaansoek teenstaan, het die voorsittende landdros bevind dat Lubbe nie oortuigende bewyse kon lewer om sy vrylating te regverdig nie. Die staat sê daar is ’n sterk saak teen Lubbe en het die aansoek teengestaan op grond van die erns van die klag en die moontlike risiko wat hy vir die ondersoek of getuies kan inhou.
Volgens bewyse op die toneel was die moord deeglik beplan en word ’n toevallige misdaad uitgesluit. Lubbe en Chantelle Oosthuizen (42) is op 16 Julie 2024 by ’n gastehuis in Sabie, Mpumalanga, in hegtenis geneem. Hulle word van die moord op Freitag en sameswering om moord te pleeg, aangekla. Die staat beweer Freitag is deur die beskuldigdes betrek om Louis Harmse, Oosthuizen se verloofde, te vermoor.
Albei Lubbe en sy mede-beskuldigde, Chantelle Oosthuizen (42), wie se borgtog ook deur die hof geweier is, bly in aanhouding in die Pretoria Moot-polisie se aanhoudingsfasiliteit. Die saak is vir ’n finale besluit oor moontlike oorplasing na die hooggeregshof vir verhoor tot 26 Augustus uitgestel.
Die ondersoek duur voort. Owerhede werk saam met forensiese kundiges, digitale ontleders en intelligensie-eenhede. Die polisie het aangedui dat daar moontlik nog individue is met kennis van of betrokkenheid by die misdaad.
Lees ook meer hier:
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
