MPUMALANGA. – ‘n Mosambiekse burger (49) is Woensdagmiddag vir openbare geweld by die Lebombo-grenspos gearresteer.
Kapt. Magonseni Nkosi sê die verdagte het sy taxi voor die hek by die grenspos parkeer.
“Toe die polisie hom berispe, het hy homself na bewering in sy taxi toegesluit.”
Die verdagte is glo deur ander landsburgers ondersteun. Die polisie moes rubberkoeëls gebruik om die wanordelike skare uitmekaar te jaag.
“Geen beserings is aangemeld nie.”
Nkosi sê die taxibestuurder is op aanklag van openbare geweld gearresteer. Die situasie is onder beheer gebring en geen verdere insidente is daarna aangemeld nie.
“Die polisie monitor die situasie.”
