KWAZULU-NATAL. – Die verhoor van 62 beskuldigdes wat teregstaan in verband met die openbare geweld en onrus wat KwaZulu-Natal in Julie 2021 getref het, is Maandag in die Durban-hooggeregshof tot 27 Julie uitgestel. Verskeie beskuldigdes se prokureurs het onttrek en regshulp moet bekom word.
Natasha Ramkisson-Kara, NVG-woordvoerder, sê die verhoor kon nie begin nie nadat die hof ingelig is dat verskeie beskuldigdes sonder regsverteenwoordiging is nadat hul prokureurs vroeër die dag aan die saak onttrek het. Die hof het die betrokke beskuldigdes gelas om onmiddellik om regshulp aansoek te doen. Die staat het intussen aangedui dat hy gereed was om met die verhoor voort te gaan en vyf getuies beskikbaar gehad het om te getuig. Regshulp Suid-Afrika moet nou op 27 Julie aan die hof terugvoer gee oor die aanstel van regsverteenwoordigers vir die beskuldigdes.
Die beskuldigdes staan tereg op aanklagte van aanhitsing tot openbare geweld, aanhitsing tot terrorisme, sameswering om openbare geweld en moord te pleeg, terrorisme, opruiing en openbare geweld.
