Die nasionale vervolgingsgesag (NVG) het die skorsing van adv. Ntaba teruggetrek, ná ’n tussentydse verslag deur die kantoor vir etiek en verantwoordbaarheid (OEA) oor gebeure wat op 15 en 18 Mei 2026 tydens die saak van Madoda Johannes Sibanyoni plaasgevind het.
Kaizer Kganyago, NVG-woordvoerder, sê volgens die verslag is verdere ondersoeke nog nodig om die volledige omstandighede van die voorval te finaliseer, maar daar is bevind dat Ntaba saamgewerk het met ondersoekers en dat daar geen aanduiding is dat hy met die ondersoek sou inmeng nie. Sy weergawe oor beweerde veiligheidsrisiko’s is ook oorweeg.
Die voorval het verband gehou met ongewone prosedure en veiligheidskwessies van die saak, wat daartoe gelei het dat interne ondersoeke ingestel is om te bepaal wat tydens die hofverrigtinge gebeur het en hoe veiligheids- en administratiewe prosesse verbeter kan word. Ná oorweging van die tussentydse bevindings het adv. Andy Mothibi, die nasionale direkteur van openbare vervolgings, in oorleg met die Mpumalanga-direkteur van openbare vervolgings besluit om die skorsingsbrief terug te trek en Ntaba toe te laat om sy werk te hervat. Die NVG sê die finale verslag sal ook aanbevelings bevat oor beter veiligheidsmaatreëls vir aanklaers en verbeterde interne kwaliteitsbeheer om soortgelyke voorvalle in die toekoms te voorkom.
Intussen gaan die hofsaak voort, met verskeie regstappe en appèlaansoeke wat nog hangende is.
