GAUTENG. – Die polisie het bevestig dat die dissiplinêre verrigtinge teen lt.genl. Sibiya voortgaan en nie gestaak is nie. Die dissiplinêre verhoor en ’n aparte dringende aansoek in die arbeidshof is twee afsonderlike sake wat parallel voortgaan.
Volgens brig. Athlenda Mathe, die nasionale polisiewoordvoerder, is die dissiplinêre verhoor Maandag aangehoor, waarna die aansoeker se versoek om uitstel toegestaan is. Die saak is tot 12 Oktober uitgestel om hom die geleentheid te gee om met sy regsverteenwoordigers te konsulteer.
Die dringende aansoek in die arbeidshof is ook Maandag aangehoor en is verdaag sodat die polisie sy opponerende stukke kan indien en die aansoeker sy repliserende beëdigde verklaring kan indien voordat die hof die saak verder aanhoor. Die arbeidshof-aangeleentheid is steeds sub judice en die polisie sê hy sal daarom nie oor die meriete van die saak kommentaar lewer nie.
